Այն կրում է «Լայնացրո՛ւ մտահորիզոնդ` ներդնելով նոր փորձը քո երկրում» խորագիրը:

Հավաքը կազմակերպվում է «Եվրոպական գյուղացիական երիտասարդություն» միջազգային կազմակերպության եւ «Եվրոպայի խորհրդի եվրոպական երիտասարդական հիմնադրամի» աջակցությամբ: Միջոցառմանը մասնակցելու են եվրոպական տարբեր երկրներ ներկայացնող գյուղացիական երիտասարդական կազմակերպությունների 5-հոգանոց պատվիրակություններ, ինչպես նաեւ տեղական իշխանությունների եւ շվեդական պետական ապարատի ներկայացուցիչներ:

Կազմակերպիչների համոզմամբ` թե՛ եվրոպական, թե՛ տեղական գյուղացիական համայնքներում խնդիրները գրեթե նույնն են` երիտասարդության ցածր մասնակցություն հասարակական կյանքում, աշխատանքային տեղերի պակաս, նվազ տեղեկացվածություն, սոցիալական եւ տնտեսական հարցեր: «Եվրոպական Ռալլի-2010» ամենամյա երիտասարդական հավաքն էլ անցկացվում է հենց այն նպատակով, որ երիտասարդները փորձի փոխանակման շնորհիվ փորձեն գտնել գյուղական վայրերում նշված խնդիրների լուծման հնարավոր տարբերակներ:

Մասնակից երիտասարդները կծանոթանան ծրագրային նոր գաղափարների, մեթոդների ու գյուղական վայրերում երիտասարդության կյանքն ավելի ակտիվ դարձնելու նորանոր փորձերի հետ, որոնք միտված կլինեն գյուղի ու գյուղացիական երիտասարդության ապրելակերպի զարգացմանը:

Հավաքին մասնակցելու է նաեւ գյուղացիական հայ երիտասարդությունը, որպեսզի, ինչպես ռուսներն են ասում, «себя показать, на других посмотреть»: Այնտեղ գիտելիքներ ձեռք բերելուց բացի` նրանք կներկայացնեն հայկական մշակույթը, երգը, պարը, տարազները, տեղական արտադրանքը` կաթնամթերք, քաղցրեղեն, ավանդական ուտեստներ ու հայկական դեղձն ու ծիրանը:

Գայանե Մարտիրոսյան